نحبّك ... يا تـونس ... بقلم زهرة مراد /قليبية

يا تونس يا خضرا ما احلاكْ

بصغاركْ وكباركْ
برجالكْ ونساكْ
انتِ العزّ وانتِ الفخرْ
وعمري ما نجّم ننساكْ
فيك أمّي وبابا وأجدادي
فيك عمري وحبّي وأولادي
فيك الماضي وفيك الحاضرْ
والمستقبل انشاء الله زاهرْ
يا تونس راك بنت عروشْ
واسمك شكون ما يهابوشْ
أحرارك ما يخافوا ظلاّم
على خاطرك ماتوا
وما همّهم حكّام
يا تونسْ نحبك برشهْ
بشوارْعِكْ وشجْركْ
بترابكْ وحجركْ
بكـُتّابك وجوامعك
بآذانكْ وصوامعكْ
ببناتكْ وأولادكْ
بالناس اللي فيك الكلّ
باللّي يشرب واللي يصلّي
باللـّي يقـــرا والبطّــــال
باللّي يخدم في المرمّــة
واللّي وسخ الشارع يلمّا
واللّي يجمع في الزيتون
واللّي بالتجارة ممحون
باللّي يكتب واللي يغني
باللّي يرسم واللي يبني
باللّي على ذراعو شمّرْ
يبني في تونس ويعمّرْ
باللي بذهْنو فيكْ يفكّر ْ
واللي بعِلمُو ليكْ يدبّرْ
باللي في بحركْ سابحْ
وباللي في ترابك سارحْ
برجال الحومة ونساها
باللي زيّن صورتك علاّها
نحبّك يا تونس يا بلادي
ربي يصونك من كلّ الاعادي
يا تونس يا بلادي ما احلاكْ
ما احلى بحرك ما احلى هواكْ
نكتب ونوصّف ونقول
ولكن حقك ما يوفّيه القول
زهرة مراد – قليبية 14 أفريل 2011