الشاعر المصري حسنين السيد : رسالة حب

 ( عارفة يا حبيبتى ) .. 

شبابيك القلب المقفولة ..

عايز أفتحها واشوف الشمس  !!

والهمس اللى يدورحواليها..

يتسجِّل جوة كتاب العشق

 وحرف بحرف

أصل انامن زمن التِّجوال

 فى شوارع حبى الضايع  ؛

قفلت بيبان القلب وقلت :

لو ينده تانى عليه الحب

أنا مش سامع   !!

  

تعرفى ليه ؟

علشان انا عشت زمان ،

وانا جوه ضلوعى حاجات  ؛

        مش زى بقيت البنى آدمين  !!

قلبى  :  كان الفرس الجامح

المخلوق علشان مايكون فى الحلبة ..

 هو الفرس الرابح  !!

لكن..

فى الصخر الموجود على أرض الواقع  ؛

اتعتر فرَسى قبل مايوصل ،

واتسَرْبل بالدم الدافق من شريانى

علشان كان باصِص للآفق الممتد بعـيـ ـ ـ ـ ـ ـ ـ ــد

كان متهيأ له :

ان الشفق الأحمر فى نهاية المشوار ..

روضة أزهار مستنيَّاه..

مش دم الشمس المدبوحة  !!

لكن دلوقت ..

وانا شايل أسئلتى المطرُوحة وعايزة اجابة..

مش قادر الملم لحم لسانى

لاجل أقول ،

وانا لحم لسانى ..

متبحتر عرض وطول جوه حوارى القهر ،

وان كان يتلم..

بالقى حروف الكلمة تتوووووه..

 تتفرط بين سندان الخوف

والصمت  !!

( عارفة ياحبيبتى ..

لو ح نترجم حتى حروف

كلمة : صمت

  صاد  ..  ميم ..  ته   )

راح نلقى تركيبة عجيبة  !!

حرف الصاد :   صبر  

حتى الكلمة جاية صريحة من الصبار  ..

المزروع فوق الشبابيك ..

أو فى الحلق

حتى الخلق العايشة معانا ..

                 دهنوا به بق الحلمات فى الصدر   !!

حرف الميم ..

يبدأ أول كلمة :  موت 

والموت مش لازم يبقى بمعناه الحرفى

داالمعنى الحرفى لكلمة( موت ) ..

 أضعف أنواع الموت   !!

حتى اللى بيموت بصحيحح ماهواش مسئول   !!

لكن خوفى عليكى شديد  ..

أصل انتى _ برضه – أول حرف ف اسمك:

  ميم   !!

 

حرف الته

ياولدااااااه ..  توهـة  ،

والتوهة ف قلب الرمل المتحرك..

مش عايزة قصايد ،

 ولا شعراء  !!

لكن ياحبيبتى

انا رايح الم لسانى المتبحتر فى حوارى القهر  ،

وألم حرف الكلمات التايهة..

يمكن .. أقدر أنطق ،

 وافتح شبابيك القلب المقفولة ،

 وأشوف الشمس  !!

 الراسل/

حسنين السيد حسنين