الشاعر المصري حسنين السيد : القاهرة

 

 *

ولاننا ياقاهرة كنا الاجابة والسؤال

ولاننا كنا المسافة بين طموحك

والطريق للاكتمال

أو .. بين طريقنا للردى

اتقفلت طول المدى كل البيبان فى وشنا :

باب الفتوح

وباب زويلة

والغفير

حتى باب النصر من سكتنا ضاع 

بين اللى ساوم واللى باع  واللى انحنى

أو بين فلول جيش الرعاع والأدعيا

حتى قمرنا لما قرّب يكتمل

وتكتحل عين الصبايا بالضيا

اللى انفتح بينى وبينك  _ للأسف _ باب الوداع

*

ولاننا ياقاهرة .. لحم الدواير والخطوط

ولاننا ..  فوق الشطوط ماشيين حيارى وفى القصايد نرسمك

مالقيتش غير عسكر ونيل بيقسمك

باعد مابين الضفتين

والأخطبوط لفلف عليكى وجندلك

*

فنزلت باب الخلق أبحث عن أثر شبابيك قدام

أرابيسك منقوش بالصدف

أطل منها ع التاريخ اللى انحرف بيه المسار

وارصد خبايا الانكسار .. فكر وعلم

مالقيتش غير بيّاع عجوز

بيبيع ( نايات )  مالهاش نغم

قرّبت منّه أسأله :

اوصف لى سوق الخشابين والنحاسين

رد بأنين

تقصد تقول : النخاسين

مش هو ده برضه الطلب ؟

مطرح ما تمشى .. ح تلاقيهم موجودين

أصل ( المثلث ) انقلب

فمشيت حزين

مشيت حزين

يا.. قاهرة